Getrou aan SSK se leuse van “Werk saam, wen saam”, ondersteun SSK-leierskap die beginsel dat die resultaat van samewerking beter is as die som van individuele prestasies. Ons leierspan van wêreldgehalte deel dieselfde beginsels van etiek en waardes en werk tot voordeel van sowel werknemers as lede.
Francois Swanepoel
Francois matrikuleer in 1993 aan Hoërskool Wolmaransstad waarna hy sy BCom Rekeningkunde en Hons BCom. Bedryfs en Bestuursrekeningkunde asook later sy MBA verwerf aan die Noordwes Universiteit. Hy begin sy loopbaan by Suidwes Landbou in 1997 as Interne Ouditeur vanwaar hy by PLK Landbou aansluit as Snr. Rekenmeester en ook later Finansiële bestuurder by Boland Agri. Na die amalgamasie tussen Boland Agri en WPK beklee hy die pos van Hoofbestuurder Handel (Kus) en Meganisasie totdat hy in 2015 aansluit by VKB Landbou as Uitvoerende Direkteur : Kommersieel en sluit Januarie 2022 aan by SSK. Francois is mal oor enige sport waarvan tennis en krieket sy gunsteling sportsoorte is. Hy is getroud met Marlene, ‘n gebore Namibiër. Hulle het twee kinders.
vacant
?
André Burger
André het is 1990 aan die Hoërskool CR Swart op Brandfort gematrikuleer. Na skool het hy een van sy passies gaan uitleef en dadelik as Staandemaglid by die SANW aangesluit, in 1996 verlaat hy die SANW met die rang van Kaptein. Sy loopbaan in die landboubedryf het in 1997 by Senwes as ‘n Verkoopsklerk begin. Later het hy by Senwes en Afgri as Takbestuurder by onderskeidelik Dewetsdorp, Petrusburg, Marble Hall en Bloemfontein diens gedoen. Hy voltooi die MPP en BOP bestuursprogramme aan die Universiteit van Bloemfontein. André en sy vrou Annalise, het twee kinders, ‘n seun en ‘n dogter. Hy spandeer elke oomblik van sy vrye tyd om ‘n gedeelde passie, rots en strandhengel, saam met sy seun uit te leef. Hy is ook lief daarvoor om met sy hande te werk.
Armandt Horne
Armandt het ‘n Nasionale Diploma in Bemarking verwerf by die destydse PE Technikon (Saasveld kampus), waarna sy loopbaan by Klein Karoo Koöperasie begin het. Hy het van Takbestuurder gevorder tot senior Takbestuurder verantwoordelik vir die De Rust- en Calitzdorp handelstakke. Gedurende 2012 het hy aangesluit by OVK as Bestuurder: Handel-Suid met verantwoordelikheid vir handel, brandstofverspreiding en meganisasie (Claas en Massey Ferguson) in die streek. Armandt is lief vir rotshengel en geniet dit om die agterpaaie op sy bergfiets te verken. Hy is getroud met Elizma en het twee seuns.
Wonga Tutu
Wonga het in 1985 aan Daliwonga Senior Sekondêre Skool gematrikuleer voordat hy ’n Sekondêre Onderwysdiploma aan Cicira Kollege voltooi het. Hy het sy loopbaan as onderwyser begin, ’n rol wat hy vier jaar lank vervul het, voordat hy teruggekeer het universiteit toe om ’n BA-graad in Administrasie aan die Universiteit van Durban-Westville te studeer. Op die voltooiing van sy studies, het hy die ontwikkelingsbedryf betree en verskeie NRO’s bestuur, onder andere die Mount Ayliff Ontwikkelingsagentskap en die Mynwerkers Ontwikkelingsagentskap. Hy het later as die Oos-Kaap Provinsiale Bestuurder vir die Nasionale Ontwikkelingsagentskap gedien. Gedurende hierdie tyd het hy ook sy Meestersgraad in Ontwikkelingsstudies aan die Nelson Mandela Metropolitaanse Universiteit voltooi. Wonga het vervolgens as Hoof Uitvoerende Beampte van Africa’s Best 350 Ltd, ’n toonaangewende busmaatskappy in die Oos-Kaap, gedien waar hy vir 10 jaar leiding verskaf het. Daarna het hy by Umtiza Farmers’ Corp en Humansdorp Koöperasie aangesluit waar sy uigebreide leierskap- en ontwikkelingskundigheid tot die lanbousektor, ’n bedrae gelewer het. Wonga is onlangs by SSK verwelkom as Senior Bestuurder, met die verantwoordelikheid om Umtiza Farmers’ Corp te bestuur. Hy is getroud met Bathabile, en saam is hulle geseën met drie seuns.
Danie Slabbert
Danie het aan Framesby Hoërskool in Port Elizabeth gematrikuleer voordat hy sy B.Rek.graad aan die Universiteit van Stellenbosch voltooi het. Hy het later as ’n Geoktrooieerde Bestuursrekenmeester gekwalifiseer en het sy MBA-graad, met onderskeding, aan die Universiteit van Johannesburg verwerf. Met uitgebreide ervaring wat strek oor rekeningkunde, landbou, VGV’s (Vinnig-Groeiende Verbruikersgoedere), finansies, vervaardiging en kleinhandel, is Danie passievol oor deurlopende leer en professionele ontwikkeling. Hy floreer wanneer hy nuwe projekte aanpak en sy kundigheid in dinamiese, vinnig-veranderende omgewings toepas. Danie is met Marizanne getroud, en saam het hulle drie dogters. Hy geniet dit om tyd by die see deur te bring en heg groot waarde aan die balans tussen gesinslewe en loopbaanontwikkeling.
Pieter Malan
Pieter Malan beskik oor 33 jaar relevante landbou ondervinding wat hy opgedoen het in senior posisies by verskeie landbou organisasies en maatskappye in Suid-Afrika. Hy beskik oor ‘n kwalifikasie in Algemene bestuur (UNISA) en het ook verskeie Bestuursontwikkelings programme voltooi by USB, Harvard Business School en GIBS. Hy is getroud met Elzabè en hulle het 2 volwasse kinders. Sy wye belangstellings sluit in die kweek van bonsai bome en fietsry.
Gerdus Steyn
Gerdus matrikuleer in 1998 aan die Hoërskool Heidelberg in die Wes-Kaap. In 1999 werk hy eers by Eureka Mills voor hy by SSK Graan, Heidelberg aansluit as leerling-Gradeerder. In 2000 skuif hy Karringmelksrivier toe, waar hy die operasionele deel van SSK Veevoer hanteer. Sedert 2001 is hy in Swellendam en leer die Saadbedryf intensief ken. In 2014 word hy bevorder tot Bestuurder: Saad en op 1 Mei 2023 tot Senior Bestuurder: Saad. Hy beskik oor uitgebreide kennis van die graanbedryf. Gerdus is getroud met Suzanne, is lief vir die natuur en geniet ‘n rondte gholf op naweke.
Henry Gale
Henry het in 1988 aan die hoërskool Pionier te Vryheid KwaZulu Natal gematrikuleer. Hy het daarna militêre diensplig voltooi te Voortrekker Hoogte tot 1990. In 1991 begin hy te Natalse Landbou Koöperasie as leerling gradeerder en vorder tot Silobestuurder in 1994. In 1996 word hy bevorder tot Produkte Bestuurder by die Natalse Landbou Koöperasie en behou die pos tot 2004 waarna Natalse Landbou Koöperasie geamalgameer met Afgri (Pty) Ltd. Hy word Streeksbestuurder Hantering en Berging – Natal tot 2010 waarna hy aansluit by SSK. Hy is getroud met Carla en het ʼn seun. Hy is lief vir die natuur en landbou en beoefen graag sport soos langafstand hardloop en hengel.
Adam van Wyk
Adam van Wyk matrikuleer te Paul Roos Gimnasium in 1998 waarna hy sy B.Rek en Bcomm Bestuursrek Hons. by die Universiteit van Stellenbosch verwerf. Hy slaag ook sy Geoktrooieerde Bestuursrekeningkunde eksamens in 2004 waarna hy in verskillende industrieë in finansiële en operasionele bestuur spesialiseer en sy breë besigheidbestuur ondervinding opdoen. Mees onlangs het hy as operasionele bestuurder by Southern Oil op Swellendam gewerk. Adam is passievol oor groeiende en dinamiese besighede en projekte. Hy is getroud met Lize van Wyk en het twee kinders, ‘n dogtertjie en seuntjie. Hy hou van nuwe projekte aanpak en om in sy af tyd houtwerk te doen.
Villiers van Veen
Villiers het in 1997 gematrikuleer aan die Hoër Landbouskool Boland waarna hy die grade B.Rek by die Universiteit van Stellenbosch en B.Compt (Hons) by UNISA verwerf het. Hy het sy klerkskap by Moores Rowland voltooi en as Geoktrooieerde Rekenmeester gekwalifiseer, waarna hy by Ernst & Young in die VSA, Nederland, Namibië, Noorweë, Ghana en Suid-Afrika gewerk het. Na sy terugkeer na Suid-Afrika het hy ook die Geoktrooïeerde Finansiële Ontleder kwalifikasie verwerf en was die Beleggings Risiko Spesialis, en later Bestuurder, by Momentum Batebestuur (voorheen Metropolitan Bate Bestuurders) voor hy hom by SSK aangesluit het. Hy is getroud met Catherine, ‘n onderwyseres, wat sy liefde vir familie, vriende, die natuur en ‘peanut butter milkshakes’ deel. Hulle het 3 kinders, ‘n tweeling en ‘n jonger boetie.
Alwyn Burger
Alwyn het aan die Hoërskool Overberg op Caledon gematrikuleer in 1991. Na hy sy diensplig voltooi het, het hy sy aanvanklike studies begin deur sy ND: Personeelbestuur te verwerf aan die destydse Kaapse Technikon, en daarna deeltyds sy graad in Menslike Hulpbronbestuur deur Unisa voltooi tesame met sy akkreditasie by die SABPP as Geoktrooïeerde Praktisyn. Hy het ook sy Graad in Besigheidsadministrasie deur Unisa voltooi in 2015. Hy het sy loopbaan begin as Opleidingsbeampte vir Stellenbosch Farmers Winery, was vir vier jaar Personeelbeampte by Swartland Groep en het daarna die landbou betree as Menslike Hulpbronbestuurder by landbou maatskappye Noord Boland/ Boland Agri en MKB voor sy aanstelling by SSK as MH Bestuurder op 1 April 2006. Hy is ook ‘n kranige fietsryer en in sy vrye tyd soek hy die natuur op, is lief vir fotografie en vinnige motors.
Emmie Germishuys
Emmie is ‘n boorling van die Karoo en het groot geword in Steynsburg waar sy in 2001 aan die privaatskool Paul Kruger Kollege matrikuleer. Sy het aan die Universiteit van die Vrystaat die Grade B Rek (Cum Laude) en B Rek Honneurs verwerf. As beurshouer voltooi sy haar klerkskap by Pricewaterhouse Coopers op Robertson en kwalifiseer as Geoktrooïeerde Rekenmeester in 2009 na die suksesvolle voltooiing van beide raadseksamens. Sy begin op 1 Oktober 2009 as Rekenmeester by SSK en is sedert September 2012 in die pos van Senior Bestuurder: Finansies. Sy behaal die graad B Com Regte deur Unisa in 2015. Emmie is lief vir sport en sy en haar man Rohan speel graag gholf en sy draf ook om fiks te bly. Hulle het 2 seuns.
Koos van Zyl
Koos het in 1994 aan die Hoërskool Langenhoven op Riversdal gematrikuleer. In 1995 begin hy werk by Eerste Nasionale Bank en verwerf ook sy B.Com graad deur UNISA. Na 16 jaar in die Bankwese begin hy aan die einde van 2010 by SSK as Bestuurder: Finansies en Administrasie te Heidelberg tak. Koos is getroud met Adri en hulle het drie kinders.
Andre Joubert
André Joubert het grootgeword op Swellendam en aan Paarl Gimnasium gematrikuleer. Hy verwerf ‘n B.Agric. Admin- asook ‘n Honneursgraad in Landbou-ekonomie aan die Universiteit Stellenbosch. Na sy studies is hy werksaam in beide Engeland asook die Falkland Eilande. Terug in Suid-Afrika het hy onderskeidelik 5 jaar elk by FNB en ABSA as Landbou-ekonoom gewerk en omgesien na die Weskus sowel as die Overberg-distrik. Hy is getroud met Sunette en is die trotse pa van ‘n pragtige dogtertjie en seuntjie. In sy vrye tyd geniet hy bergfiets ry, tyd met familie en vriende en natuurlik ‘n lekker braai.
Rikus Vorster
Rikus het in 2001 aan Hoërskool Waterkloof in Pretoria gematrikuleer en is ‘n gekwalifiseerde Geoktrooieerde Rekenmeester met ‘n Meestersgraad in Finansies van die Universiteit van Kaapstad. Hy het sy loopbaan by Deloitte begin, waar hy van ouditklerk tot Assosiaat-Direkteur gevorder het en uitgebreide ondervinding in verskeie industrieë en lande opgedoen het. Nadat hy Deloitte verlaat het, het hy senior rolle beklee, insluitend Finansiële Direkteur by G4S Botswana en Hoof Finansiële Beampte by Digiblu Groep. In 2022 het Rikus by Die Koöperasie in Humansdorp as Hoof Finansiële Beampte aangesluit en is hy in 2024 as Hoof Uitvoerende Beampte aangestel, waar hy ‘n omdraaistrategie geïmplimenteer het en die besigheid na die SSK-samesmelting gelei het met die ondersteuning van ‘n sterk en toegewyde span. Rikus is getroud met Juliet, en saam het hulle vier kinders. Hulle geniet sport en buitelugaktiwiteite, waardeer tyd saam met familie en vriende, en om tyd in God se skepping te spandeer.
Herbert Streicher
Herbert is ʼn boorling van George waar hy in 1994 aan die Hoërskool Outeniqua gematrikuleer het. Na skool het hy begin om sy passie vir Informasie Tegnologie uit te leef deur sy MCSE by ITIQ in Kaapstad te verwerf. Na 5 jaar as Informasie Tegnologie Bestuurder by Tuinroete Agri sluit hy September 2013 by SSK aan as Senior Bestuurder Inligtingstegnologie. Hy studeer tans DIP ITE deur Unisa. Herbert is getroud met Suzanne, ʼn kleuterskool onderwyseres, en hulle geniet om hulle vrye tyd saam met hulle twee Basset honde te spandeer.
Francois Smit
Francois se professionele ervaring bestaan uit byna 25 jaar se sagteware ontleding en ontwikkeling in verskillende bedrywe. Hy matrikuleer in 1995 by Hoërskool Hartbeespoort waarna hy begin studeer en werk as Cobol programmeerder by MGK in Brits. In 1999 trek hy Kaap toe en werk onder andere by Digica, ‘n internasionale sagteware maatskappy. In 2007 begin hy by SSK waar hy bevoorreg was om in 2010 deel te vorm van die span wat SSK na die nuwe tegnologie era help oorgaan het. In 2016 verwerf hy sy B.Sc. Informatika-graad deur UNISA. Hy is ‘n groot familie man en hy en sy vrou Elize het 2 kinders. Hy ag kwaliteit tyd saam met sy gesin as prioriteit en geniet die daaglikse stap-geselsies saam met sy vrou. God is die middelpunt van sy menswees en hy spandeer meeste van sy vrye tyd om God te dien op uitreike, by die plaaslike kerk en in die gemeenskap.
Freek Meyer
Freek matrikuleer aan die Hoërskool Wesvalia in Klerksdorp, waarna hy sy BCom (Regte) graad aan die Noordwes-Universiteit behaal. Freek het ook sy MBA-graad aan die Noordwes-Universiteit behaal. Hy het uitgebreide ervaring as maatskappysekretaris en regsadviseur in verskeie industrieë, insluitende finansiering- en kommersiële- eiendomme. Hy beskik ook oor meer as 15 jaar se ervaring in die landbou-industrie.
Hy is getroud met Leonie en hulle het twee seuns. Sport is ‘n groot belangstellingsveld vir Freek en die natuur lê hom ook na aan die hart.
Petrunel Botes
Petrunel het in 1996 aan Hoërskool McLachlan in die Langkloof gematrikuleer. Sy bring meer as 25 jaar se ervaring in IT, besigheidsprosesse en projekbestuur na haar rol. Sy het haar loopbaan in 1997 by Die Humansdorpse Koöperasie (HLK) begin en het haar akademiese kwalifikasies deeltyds met onderskeidings voltooi, insluitend ’n BTech-graad in Inligtingstegnologie asook verskeie kort kursusse in leierskap-, projek- en veranderingsbestuur. In 2012 is sy as Bestuurder: Inligtingstelsels aangestel en in 2022 is sy tot departementshoof van HLK se IT-afdeling bevorder waar sy strategiese leiding oor infrastruktuur, stelselsontwikkeling en digitale transformasie bied. Petrunel het in 2025 by SSK aangesluit om die rol van Sake-Argitek te vervul. Sy is passievol oor die ontwikkeling van mense, tegnologie, en geniet die natuur, lees en tyd saam met haar gesin. Sy is getroud met Jaco en is die trotse ma van drie kinders.